" मेवाड़ री चिंतामणि री लाखीणी वाता "


                  भारत वान्चो
सबी नर भारत वान्चो रे ,सही सुख योहिज साँचो रे |

घरो घर भारत वान्चो रे ,सबी नर भारत वान्चो रे ||

भारत में अवतार लियो नै ,भारत सु अणजाण |

वी भारत रा पूत नहीं ,पण भारत रा पाषाण ||

भारत सु भ्रमणा मटे रे ,भारत सु भय जाय |

भारत ने भगवान् वणायो ,सुख रो सांच उपाय ||

भारत रो रत्नागर सागर ,ई रो छः न पार |

सारा ही नर नार विचारो ,वेदा रो अवतार ||

भारत भार उचायो सबरो ,आरत भार उतार |

भारत व्हैता ई भारत रो ,यो कई हाल अबार ||

            जगावण

जागो जागो रे भारत रा वीरा जागो |

थाणो कठे केशारियो वागो ||

थे हो पूत वणारा जाया ,ज्य़ारो जश सुरगा तक लागो |

अबे ऐश आराम वास्ते ,मत कूकर ज्यू भागो ||

दारु दुर्जन संग निवारो ,पर दारा ने त्यागो |

यो आळस रो अवसर नी है ,सोवे सो ही अभागो ||

अंग्रेजा री अक्कल सीखो ,अवगुण छोड़ो आगो |

ऊभा मूत्या मत नी आवे ,समे काम सर लागो ||

इंद्रिया जीत जीतग्यो मन ने ,सो सरदार सभागो |

यारो होय गुलाम रहे सो ,कुल ने देवे दागो ||

रे'त पाळ रजपूती राखो ,ईश्वर में अनुरागो |

छोड़ो झूट घमंड खार ने ,पळ पळ पग दो आगो ||

                    डाकी

यू कई पड्यो पसर ने डाकी |

थारे कणी जगा जावा की ||

कठी पगरखी कठी अंगरखी ,कठी पागडी न्हाकी |

टिगट टेमरी खबर खोज नी ,कटगी गांठ रिप्या की ||

घर घर जाण विह्यो थू गाफल ,रेल घणी दौड़ा की |

चढ़े जणी ने पड़े उतरनो ,या है रीत अठा की ||

आयो कठू कठे उतरेगा ,कतरा टेशण बाकी |

खाधी भांग गाळमा कीधी ,बोतल पीधि आखी ||

कुण सुणे ने कीने केवा ,हालत हाय नशा की |

शंकर सावधान व्हे जणीरो ,देख दशा दूजा की ||

(यो चतुर चिंतामणि रो ज्ञान है)